Քսան տարի շարունակ մենք կարողացել ենք զարգանալ, առաջ ընթանալ, միջազգայնորեն ճանաչում ստանալ, քանի որ մեր սահմաններն ապահով են:
 
Հայ զինվորը մշտապես պաշտպանում է իր հայրենիքն ու հողը: Նրա մղած պայքարն արդար ու հայրենանվեր պայքար էր, որտեղ նա հաղթանակ տարավ: Կարծում եմ` ցանկացած պահի մեր բանակը կարող է հակահարված տալ ամեն մի ոսոխի, որովհետև մեր ոգին, մեր ուժը, մեր կամքը հզոր է, որովհետև մեր զինվորների երակներում Մեծն Հայկի, Վարդանի, մեր հայ ֆիդայիների բազկի գենն է նստած, որովհետև մեր զինվորները Սարդարապատի, Բաշ Ապարանի, Ղարաքիլիսայի մեր հերոսամարտերը հաղթած զինվորների հետնորդներն են:
 
Այսօր ես դիմում եմ նախ և առաջ հայոց մայրերին, մեր փափկասուն և սիրելի կանանց, հայ ընտանիքի սյուններին: Սիրե՛լի մայրեր, շնորհակալ ենք ձեզ, շնորհակալ ենք, որ դուք նման որդիներ եք ծնել ու դաստիարակել, որոնց մի մասն ընկավ հանուն Հայրենիքի, հանուն Հայաստանի և Արցախի պաշտպանության, և այսօր Եռաբլուրում մենք խոնարհում ենք մեր գլուխներն այդ արծիվների, այդ հզոր և կարող տղաների հիշատակի առջև, ովքեր մահով անմահացան, ովքեր տվեցին իրենց կյանքը` հանուն Հայաստանի, հանուն Արցախ աշխարհի:
 
Ուզում եմ իմ շնորհակալական խոսքն ուղղել Սփյուռքից եկած և հայկական բանակում մարտնչած տղաներին, ովքեր կարողացան թողնել իրենց տաքուկ անկյունը, ովքեր իրենց խաղաղ կյանքը փոխարինեցին խրամատներով, ովքեր եկան, զենք վերցրին և Հայաստանի, Արցախի որդիների հետ միասին պաշտպանեցին մեր հայրենի հողը: Նրանց մի մասն էլ ընկավ, հերոսացավ Մայր Հայրենիքի, Մայր Հայաստանի համար. փա՛ռք ու պատիվ նրանց:
 
Ուզում եմ նաև խոսքս ուղղել մեր հրամանատարական կազմին, ովքեր այսօր իրենց օրինակով ու նվիրումով, իրենց գրագիտությամբ ու կազմակերպվածությամբ դաս և օրինակ են դարձել մեր զինվորների համար:
 
Մենք հավատում ենք ձեզ, հպարտ ենք ձեզանով, սիրելի´ զինվորներ, սպանե´ր, գեներալնե´ր, հրամանատարնե´ր, և հավատում ենք, որ հայ ժողովրդի, Հայաստանի և Արցախի խաղաղությունը, կայունությունը նախ և առաջ պայմանավորված է նաև հայոց հզոր, ուժեղ, կարող բանակով:
 
Թող մեր բանակը շարունակի զարգացնել իր կարողություններն ու հմտությունները, թող ուժն ու տոկունությունը, կամքն ու կողմնորոշումը միշտ ուղեկցնեն մեր զինվորներին, և նրանք միշտ անձնվիրաբար ծառայեն մեր երկրին, մեր պետությանը:
Փա´ռք Հայկական բանակին, որն առաջացել է տասնամյակներում և, վստահ եմ, կշարունակի բարձրացնել իր մարտունակությունը` մնալով տարածաշրջանի հզորագույն բանակը:
 
Տոնդ շնորհավո´ր, 20-ամյա Հայկական բանակ:
 
 
ՍԻՐՈՎ`
 
ՀՐԱՆՈՒՇ ՀԱԿՈԲՅԱՆ