Վարժարանի մարգարտեայ տարեդարձը տօնելու համար  խնամակալութիւնը կազմակերպած է ճաշկերոյթ մը՝ գեղարուեստական կոկիկ յայտագիրով, որ տեղի պիտի ունենայ մարտ 3-ին, կ.ե. ժամը 5:30-էն սկսեալ, «Արարատ տան» «Տէօքմէճեան» սրահին մէջ:

Ձեռնարկի ընթացքին յատկապէս պիտի մատնանշուին վարժարանին ձեռք բերած ու երեք տասնամեակներու վրայ երկարող բազմաթիւ յաջողութիւնները եւ անոր ձգած դրական ազդեցութիւնը՝ իր հարիւրաւոր շրջանաւարտներուն վրայ:

Երեկոյի գլխաւոր պատգամախօսն է յայտնի իրաւաբան, Նիւ Եորք քաղաքի թմրեցուցիչներու յատուկ բաժինի դատախազ Փիթըր Ղուկասեանը։ Գեղարուեստական յայտագիրին մէջ ելոյթ պիտի ունենան «Լարք» երաժշտանոցէն արուեստագէտներ:
«Մերտինեան» վարժարանը միակ Հայ աւետարանական կրթօճախն է Միացեալ Նահանգներու տարածքին: Այնտեղ՝ նախամանկապարտէզէն մինչեւ միջնակարգի 8-րդ կարգի աշակերտները կը ստանան բարձրորակ ուսում, քրիստոնէական եւ հայեցի դաստիարակութիւն, ինչպէս նաեւ բարոյական կրթութիւն։ 

Այս յիշատակելի հանգրուանը լաւագոյն կերպով տօնելու համար  խնամակալութիւնը կը հրաւիրէ «Մերտինեան»-ի բոլոր բարեկամներն ու շրջանաւարտները ներկայ գտնուելու վերոյիշեալ ձեռնարկին:

 (Թղթակցութիւնը
վարժարանէն)

Asbarez.com