×

Ներկայացուցիչների պալատն ընդունել է Ադրբեջանին հատկացվող ԱՄՆ-ի ռազմական օգնությունը կրճատելու մասին որոշում

29.07.2021

ԱՄՆ Ներկայացուցիչների պալատն ընդունել է կոնգրեսական Փալոնի կողմից ներկայացված փոփոխությունը, որը կրճատում է ԱՄՆ-ի ռազմական ֆինանսական օգնությունն Ադրբեջանին: Այս մասին հայտնում է «Ամերիկայի ձայնը»:

Փալոնի ներկայացրած փոփոխության մեջ ասված է. «Միջազգային ռազմական կրթություն և ուսուցում», ինչպես նաև «Արտաքին ռազմական ֆինանսավորման ծրագրի» միջոցով հատկացվող որևէ ֆինանսավորում չի տրամադրվելու Ադրբեջանին:

Դրույթը չի արգելափակում հայեցողական ռազմական տեխնիկայի տրամադրումը, որը կարող է փոխանցվել Պաշտպանության դեպարտամենտի կողմից ԱՄՆ-ի օրենքների 333-րդ հոդվածի համաձայն:

Ինչպես տեղեկացնում է Ամերիկայի հայ դատի հանձնախմբի վաշինգտոնյան գրասենյակը, այժմ աշխատանքներ են տարվում նաև այդ ուղղությամբ:

Կոնգրեսի հայկական հարցերով հանձնախմբի համանախագահ Ֆրենկ Փալոնը ողջունել է Փոփոխությունների մասին հուլիսի 28-ին Պալատի կողմից կայացված որոշումը: